პოლიციამ სამუზეუმო მოპარული ექსპონატების რეალიზებაში ეჭვმიტანილი დააკავა

თბილისი, 23 თებერვალი /”ახალი ამბები - საქართველო”, ელენე ფარცვანია/. შინაგან საქმეთა სამინისტროს კახეთის სამხარეო მთავარი სამმართველოს თანამშრომლებმა გატარებული ოპერატიული-სამძებრო ღონისძიებების შედეგად სოფელ ვაჩნაძიანში მდებარე გიორგი მაისურაძის სახელობის სოფლის ისტორიის მუზეუმიდან მოპარული სამუზეუმო ექსპონატების რეალიზებაში ეჭვმიტანილი 1972 წელს დაბადებული ზურაბ ფოლადაშვილი დააკავეს.  ამის შესახებ 23 თებერვალს საქართველოს შსს-ს პრეს-სამსახური იუწყება.

ფოლადაშვილი საკუთარ მანქანაში დააკავეს, როდესაც იგი მოპარული ექსპონატების გასაყიდად მიდიოდა. მანქანაში იპოვეს მე-19 საუკუნის მოოქროვილი და მოვერცხლილი ხმლები, ასევე მე-17-18 საუკუნეების უნიკალური იარაღები.

წინასწარი გამოძიების შედეგად დადგენილია, რომ მუზეუმის ქურდობა 2009 წლის 15 იანვარს  1988 წელს დაბადებულმა ხვიჩა ახალმოსულიშვილმა ჩაიდინა, რომელიც 2009 წლის 20 იანვარს უბედური შემთხვევის შედეგად გარდაიცვალა.

გამოძიება მიმდინარეობს სსკ-ის 177-ე და 186-ე მუხლებით. დაკავებულმა დანაშაული აღიარა. გამოძიებას აწარმოებს კახეთის სამხარეო მთავარი სამმართველო. -0-