თბილისი, 9 აგვისტო /”ახალი ამბები - საქართველო”, ელენე ფარცვანია/. საქართველო უფრო მძაფრად აყენებს ნატოში შესვლის აუცილებლობის საკითხს ბოლო ინციდენტის – 6 აგვისტოს ქვეყნის საჰაერო სივრცის დარღვევისა და სარაკეტო დარტყმების განხორციელების ფონზე. ამის შესახებ საქართველოს საგარეო საქმეთა მინისტრმა გელა ბეჟუაშვილმა 8 აგვისტოს გამართულ პრესკონფერენციაზე განაცხადა ჟურნალისტის კითხვაზე, თუ როგორ აისახება ინციდენტი ნატოსთან ინტენსიური დიალოგის პროგრამაზე.
“ნატოსთან ინტენსიურ დიალოგს არანაირი კავშირი არა აქვს ამ ინციდენტთან. ერთადერთი ის არის, რომ, ამ ინტენსიური დიალოგის ფარგლებში, კიდევ უფრო მძაფრად დავაყენებთ საქართველოს ნატოში გაწევრიანების საკითხს”, - განაცხადა გელა ბეჟუაშვილმა. --0--
