საქართველოს მთავრობა გააგრძელებს ეკონომიკური სტიმულირების პროგრამას

თბილისი, 4 მარტი /”ახალი ამბები - საქართველო”, ციცია მამულაშვილი/. საქართველოს მთავრობა გააგრძელებს ეკონომიკური სტიმულირების პროგრამას. ამის შესახებ საქართველოს პრეზიდენტმა მიხეილ სააკაშვილმა სამშაბათს ვაგონშემკეთებელი ქარხნის კოლექტივთან გამართულ შეხვედრაზე განაცხადა.
 
„საქართველოს ეკონომიკა, სამწუხაროდ, ისეთივე რთულ სიტუაციაშია, როგორც მსოფლიო ეკონომიკა, ეს განსაკუთრებით აისახა მოსახლეობის საშუალო ფენებზე. ამ სიტუაციაში საქართველოს მთავრობის მთავარი საზრუნავი – ეკონომიკაა, როგორ შევინარჩუნოთ არსებული სამუშაო ადგილები და როგორ შევქმნათ ახალი – ეს არის ჩვენი მთავარი ამოცანა“, – აღნიშნა სააკაშვილმა.

პრეზდენტის თქმით, სტაბილურობისა და მშვიდობის პირობებში საქართველოს საკმარისი რესურსები გააჩნია ეკონომიკური კრიზისის დაძლევისა და გაძლიერებისთვის.

პრეზიდენტმა აღნიშნა, რომ „მსოფლიო ეკონომიკური კრიზისის  პირობებშიც კი საქართველოში არ დანგრეულა საფინანსო და საბანკო სისტემა, დროულად რიგდება პენსიები და ხელფასები ეროვნული ვალუტის – ლარის კურსი სტაბილურია“.

„თუმცა, ეს საკმარისი არ არის, იმისათვის, რომ ჩვენმა ხალხმა შვებით ამოისუნთქოს“, – აღნიშნა ამასთან პრეზიდენტმა.

პრეზიდენტმა საქარველოს მოსახლეობას ამცნო, რომ მთავრობა ახალი ინვესტიციების მოზიდვისა და არსებული საინვესტიციო პროგრამების გაგრძელების მიზნით ეკონომიკურ დიპლომატიას ხელმძღვანელობს.

„სადაც წავალთ, ფულიც იქედან უნდა ჩმოვიტანოთ“, – აღნიშნა პრეზიდენტმა. ––0––